截至48號為止,銅鑼灣皇室堡馬莎百貨公司已經有3名員工確診,連同密切接觸者共有9人相繼染上新冠肺炎。而馬莎員工使用嘅商場洗手間恐怕會成為高風險嘅傳播病毒場所,醫學會傳染病顧問委員會主席梁子超就建議,市民如果要用公共洗手間嘅時候,應該避免直接用手接觸水龍頭、廁格門柄、沖廁掣、廁板同洗手液按壓位,以防交叉感染。

梁子超認為銅鑼灣馬莎所在商場嘅洗手間存在傳播風險,建議過往兩星期到過銅鑼灣皇室堡停留時間較長或曾經到馬莎購物嘅人士,若有不適就應該搵私家醫生進行病毒檢測。梁子超指,洗手間內容易帶有呼吸道疾病同腸胃病病毒,因此所有共用裝置都有機會染上病毒。而洗手間內最多人接觸嘅五大位置——水龍頭、廁格門柄、沖廁掣、廁板同洗手液按壓位,市民就應避免直接用手接觸,接觸過以上幾個高危裝置後亦應再次清潔雙手。

圖:網上圖片