又多一間私人機構投入生產抗疫物資啦!新世界發展宣佈,會喺4月中開始生產外科口罩,由4月中至7月初,更會透過非牟利機構向超過4萬基層派發1000萬個口罩添。

新世界發展執行副主席兼總經理鄭志剛表示,透過集團慈善基金訂購咗兩部自動化生產口罩機器同埋原材料,設立兩條生產線,並興建無塵廠房,生產符合ASTM標準Level 1或以上嘅香港製造外科口罩。兩條生產線目標係4月中投產,預計每日可生產20萬個「香港製造」口罩。

集團喺本月至6月期間生產嘅口罩將會作捐贈之用。由本月中至7月初,透過8間非牟利機構轄下嘅指定中心,設置自助口罩提取機,讓預先登記嘅基層同弱勢社群領取,預計會有超4萬人受惠。疫情過後,生產嘅口罩將會供應俾集團日常營運所需,亦會以平價賣俾有需要嘅人士或團體。

鄭志剛指,自取安排能為更多基層市民伸出援手,令他們唔使活喺口罩唔夠用嘅恐懼之中。至於日後會否延長或擴展計劃,就要睇睇首階段嘅運作情況嘞。

此外,集團亦斥資一千萬元,同本地創科公司Nano Diamonds聯手,研發將納米鑽石加入口罩物料,以提高防護性能,以生產新一代低成本殺菌口罩。

原圖:新世界發展