受新型冠狀病毒肺炎疫情影響,香港大大小小嘅演唱會都被迫延期或取消,間接令業內好多人失業,有多年協辦演唱會經驗嘅通利,其演唱會部門亦因此解散。歌神許冠傑原定今年7月喺紅館嘅演唱會,都係由合作超過30年嘅通利包辦。當歌神知道並肩作戰多年嘅演唱會幕後功臣失業,好快發起支援行動,將於今個星期日(4月12號)下晝5點舉行全球網上演唱會——《2020許冠傑同舟共濟Online Concert》。呢個演唱會會喺網上平台免費同步直播,而許冠傑亦會捐出25萬元俾之前遭解散嘅21位前通利員工,幫佢哋度過短期困境。 許冠傑尋日(4月6號)下晝喺社交平台宣佈會喺4月12號下晝5點舉辦網上演唱會,仲呼籲:「希望今次演出能夠喚起業界歌手為整個行業和各部門的員工出一分力,捱過這段艱難日子。」 圖:FB@Sam Hui許冠傑