最近網上流傳咗一啲相片,印度有啲農夫餵牛食士多啤梨,隻牛好似好幸福咁,不過背後原來有唔少農夫嘅辛酸。話說因為要遏止新冠肺炎疫情蔓延,印度喺3月24日起就全國封鎖21日,全部人都要留喺家中,全國學校、商業同工業設施都需要關閉,亦導致農民無辦法將農產品推出市場。

喺薩塔拉地區種植士多啤梨嘅農夫薩隆凱就話,平時啲士多啤梨都係賣俾遊客同雪糕生產商,但而家都無晒遊客,就唯有將兩畝農地嘅士多啤梨拎去俾母牛食。佢仲話,原本希望呢批士多啤梨可以賣到80萬盧比(大約8.1萬港元),但而家連25萬盧比嘅成本都收唔返(大約2.5萬港元)。

另外喺班加羅爾,有一位種植提子嘅農夫亦因為賣唔出提子,而要喺森林棄置成本達50萬盧比(接近5.1萬港元)嘅15噸提子,佢曾經諗住免費送俾附近村民,不過就無咩人出嚟拎。

原圖:星洲網​