過去嘅週六係清明節,而內地亦都呢一日訂為國家哀悼日,哀悼新冠肺炎疫情下嘅犧牲者同病逝者。不過喺法國BFM電視台轉播武漢江灘悼念活動嘅時候,就傳出來自記者Emmanuel Lechypre嘅聲音:「佢哋喺度埋葬Pokemon(寶可夢)」。事件引嚟唔少爭議,有法國網民就批評呢位記者種族歧視、愚蠢,而呢位記者之後亦喺Twitter道歉,佢話當時以為個咪閂咗,又向中國嘅病毒受害者致敬及致歉。BFM電視台其後亦都喺Twitter上致歉,又宣布會將Emmanuel Lechypre停職一個禮拜。

有媒體就解釋,寶可夢中嘅比卡超係黃色,所以喺歐美國家就有人以寶可夢形容黃種人,亦有另一個講法就係歐洲人覺得中國人長相好「卡通」,所以就以一啲動漫嚟形容中國人。

原圖:Twitter@Manu_Lechypre​