喺新冠肺炎疫情影響下,全港學生由農曆新年假期之後就一直停課至今,復課無期,但正因為咁令小朋友可以更多時間留喺屋企,享受家庭樂。最近,婚後育有3名子女嘅霍啟剛就喺微博分享佢同大仔霍中曦一齊下廚嘅片段,而二女霍中妍就喺旁邊睇住,場面溫馨。

喺片段入面,霍啟剛同霍中曦喺廚房剪蝦腳,然後一齊整蝦碌,整完之後仲一齊拎起影相添。霍啟剛又喺微博發文表示,疫情對家家戶戶影響好大,孩子除咗要喺屋企做運動保持身體健康,亦要保持心靈快樂,要珍惜因為疫情社會活動減少得來嘅家庭時間。霍啟剛又話,同囝囝研究廚藝,好唔好食唔係重點,重點係由頭到尾完成任務,同媽媽、妹妹一齊分享。

原圖:微博@霍啟剛