喺新冠肺炎爆發初期,香港大部分市民出街都會戴上口罩,減少病毒經飛沫傳播嘅風險,不過根據現時世衞只係建議民眾同所有咳嗽或者打乞嗤嘅人保持最少1米距離,只有生病或者出現病徵,以及本身健康但需要照顧受感染嘅人,先需要戴口罩,但有報道指,世衞專家小組將會開會討論是否要修改建議,減慢病毒傳播。

最近美國麻省理工學院一項測試發現,咳嗽同打乞嗤噴出嚟嘅液體,最遠距離分別可以達到6米同8米,負責呢個研究嘅科學家擔心,現時對「安全距離」嘅認知有誤,佢認為喺某啲情況,尤其是通風欠佳嘅室內地方,戴口罩可以減低風險,亦可以將噴出嘅液體由前面轉到側面。

世衞專家小組主席、傳染病專家海曼表示,研究顯示咳嗽同打乞嗤產生嘅飛沫,噴出嘅距離比想像中遠,戴口罩或者比保持距離更有效,不過佢強調戴口罩亦都要正確方式配戴先有效,除嘅時候亦都要小心,避免雙手接觸到細菌。

原圖:新華社