礙於新冠肺炎持續,為咗避免人群聚集增加傳播病毒、感染肺炎風險,好多活動都取消咗,連一生人一次嘅大學畢業禮都唔例外。日本一間大學反而無懼疫情,照舉辦畢業禮,不過呢個畢業禮有啲特別,畢業生無需到場,只需要透過機械人就可以喺校長手上取過畢業證書,更能夠通過視像通話,同校長傾偈合照添!

日本商業突破大學喺328號,喺東京皇宮飯店舉行一次好特別嘅網上畢業禮。學校準備咗兩部戴上畢業帽、穿上畢業袍嘅機械人,畢業生只需安坐家中就可以網上操控呢個代表自己嘅機械人,喺酒店禮堂走動,由校長大前賢一手上「接過」畢業證書。而每部機械人嘅頭部位置都有一部平板電腦,等畢業生可以通過視像通話同校長傾偈、合照,好似親臨現場咁。有畢業生感慨:「我從沒想過自己會這樣參加畢業典禮。本人不在場,卻能在公共場合領畢業證,這是一次嶄新的體驗。」

 呢個咁特別嘅畢業禮,係由該校嘅全球工商管理學院院長矢中修吾教授提出嘅。佢希望呢項倡議可以為一啲難以舉行畢業或入學典禮嘅教育機構帶來幫助。

圖:日本商業突破大學