政府早前禁止4人以上嘅公眾聚集,防止新冠肺炎疫情擴散,有人關注到措施會影響到外傭週日同朋友聚會。勞工及福利局局長羅致光拍攝短片,呼籲外傭同僱主攜手抗疫,佢表示明白外傭希望喺休息日同朋友見面,但現時香港正處於抗疫嘅重要時刻,大家有必要保持社交距離,防止疫情擴散。

羅致光呼籲僱主諒解現時嘅特殊情況,同外傭商討休息日安排,鼓勵外傭留喺屋企休息或者平日放假,不過佢提醒,如果僱主唔俾外傭放假,或者強迫外傭喺休息日工作,即屬違法。

政府正進行廣泛宣傳活動,包括同總領事館合作,透過佢哋嘅網頁同社交媒體平台,向佢哋嘅國民傳遞有關信息,張貼及派發載有外傭主要語言,包括菲律賓文、印尼文同泰文嘅海報同單張,以及喺外傭主要收聽嘅電台節目播放呼籲。

原圖:大公報