喺阿根廷首都布宜諾斯艾利斯,早前無啦啦血流成河,到底發生咩事?原來係當地有個屠宰場嘅存放動物血液嘅儲存庫,突然發生爆炸,導致大約50萬公升嘅動物血液湧出街道,令到成條街都充滿腥臭味。

呢啲動物血液甚至湧入民居、下水道,有居民擔心會帶嚟衞生風險,不過當地傳染病學家Leda Guzzi就話只要當局盡快清理血液,相信唔會造成太大風險,除非有開放性傷口接觸到呢啲動物血液,或者有居民誤食先至會有危險。佢強調,牛係可食用動物,需要接受健康管理,並唔會傳播疾病。

外媒報道,居民喺事發當日聽到一聲爆炸巨響,之後就見到呢啲血液湧到街頭,仲瀰漫住難聞嘅血腥味,當局接報之後就即刻派人清理。一般正常情況,屠宰場會將動物血液儲存喺庫中,然後等專車帶走,暫時未知點解會發生爆炸。

原圖:Newsflash/@EmilianoCatena​