近期香港持續每日新增幾十宗新冠肺炎確診個案,喺尋日就有位40日大嘅男嬰確診,成為香港最年輕嘅病例。醫管局總行政經理劉家獻表示,呢名男嬰喺上個月20日滿月嘅時候,曾經被一名酒吧群組嘅女確診者抱過,懷疑因為咁而受到感染。

兒科專科醫生劉成志就估計,相信係有確診者打乞嗤,或者摸完自己眼口鼻再摸男嬰,導致傳染。佢提醒家長,嬰幼兒難以自我防疫,家長應該減少俾親友探望、避免陌生人接觸小朋友。另一位兒科專科醫生張傑就建議應該採取「專人服侍制」照顧嬰幼兒,集中少數人照顧,並做足防護措施,接觸小朋友前要清潔好雙手、保持衣服乾淨,有病徵就唔好接觸小朋友。

兩位醫生都呼籲,要盡量減少帶小朋友出去,減低感染風險,如果要外出就要同人群保持2米距離,帶唔到口罩嘅嬰孩,BB車就要用水擋,阻隔飛沫同病毒,只要做足呢啲措施,相信小朋友就會安全。

原圖:新華社​