大家都知門柄、升降機掣等公用設施表面有好多細菌,唔止公用設施,就連我哋自己嘅手機表面都有好多菌,所以要定期清潔。但原來,有樣我哋平時成日用、不過唔太為意嘅嘢,比門柄、升降機掣、手機嘅菌更多!佢就係鍵盤上面嘅Enter掣喇。

 台灣東吳大學最近喺校內升降機掣、電腦教室鍵盤、教室門柄同學生手機上,分別用棉花棒隨機採集樣本觀察細菌菌落數。結果發現,含菌量最多嘅竟然係電腦鍵盤嘅Enter掣,有成42個菌落數咁多!而手機同門柄一樣,有2個菌落數,反而最乾淨嘅係我哋平時避之則吉、可以唔掂就唔掂嘅升降機掣,只有1個菌落數。東吳大學推測,因為學校每2個鐘會消毒一次升降機,加上升降機掣貼咗保護膜,所以無一般人想象中咁污糟。而電腦鍵盤上嘅Enter掣,成日都要用到但就疏於清潔,導致含菌量最高。圖:freepik