受新冠肺炎疫情影響,今年好多招聘活動都因此而取消,偏偏每年三、四月又係應屆大學畢業生求職嘅旺季。為咗減少人群聚集又可以兼顧求職招聘,數碼港今年首辦「網上職業博覽」,共提供超過700個職位空缺,等僱主同求職者都可以通過網上遞交求職申請或初步面試,而招聘會嘅職業說明會同主題演講亦會搬到網上進行。 「數碼港虛擬招聘博覽2020」將於4月3號同4號舉行,有120家公司提供超過700個職位,當中約有5成係技術專才職位,例如程式員、數據分析師同雲端建築師等。而業務發展職位,如項目管理、業務拓展或市場營銷等就大概約3成。另外亦有提供數碼娛樂、電競、用戶介面及用戶體驗(UI/UX)設計嘅工種,部分更設有兼職同實習職位,為準畢業生同年輕人提供各式各樣嘅就業機會。 此外,今次個虛擬招聘博覽中,有大約50個網上職業論壇同招聘講座,求職者可預先喺網上預約,參加企業同求職者更可透過即時互動聊天室對話,甚至可以即時面試、一對一線上職業咨詢添。 想了解更多求職資訊,請上https://hkcyberport.vfairs.com 登記並上載個人履歷喇。 圖:數碼港