日本著名喜劇演員、《阿笨與阿占》主持志村健,早前感染新冠肺炎,病情嚴重,要靠人工呼吸器維生,但尋晚病情轉差,最終不治,終年70歲。

志村健喺1973年12月以實習身份加入TBS電視台,以組合「漂流者」主演著名現場節目《八點!全員集合》,並成為節目最受歡迎嘅演員,其後漂流者再主演另一個著名節目《漂流者大爆笑》。到咗1987年,富士電視台就開始以播出以志村健個人主演嘅節目《志村大爆笑》。之後志村健更憑住《志村健動物園》當中《阿笨與阿占》呢個單元,開始為亞洲其他觀眾熟悉。

近年,志村健身體情況唔係咁好,响2016年佢曾經患上肺炎,2018年又因為肝病入院,最近又做過胃部手術。志村健所屬事務所表示,志村健今個月17日開始覺得疲倦,19日開始出現發燒同呼吸困難等病徵,之後入院檢測,確診新冠肺炎。由於志村健病情嚴重,要依賴人工呼吸器維生,最終尋日不治。

原圖:IG@shimura_zoo_ntv