香港人鐘意食壽司、刺身,但要小心喇,因為美國有大學研究發現,寄生喺魚類嘅線蟲近40年間激增283倍!消委會亦發現市面上98%嘅魚生樣本驗出含有金屬,有啲更超標近2倍。而港人至愛嘅三文魚魚生含菌量更可媲美便便,真係隨時禍從口入!

 美國華盛頓大學研究發現,寄生喺魚類嘅線蟲「海獸胃線蟲」(Anisakis),自1978年至2015年期間竟然增加283倍,可能同氣候變化、肥料同洋流產生嘅養分、海洋哺乳動物數量增加等原因有關。香港魚類學會會長莊棣華指,線蟲唔適合喺人類胃部生存,進入人體後會鑽進人類胃壁,令人出現嘔吐、胃出血等徵狀。

 港大微生學系講座教授袁國勇指,過往有個案調查發現受污染嘅魚生包括三文魚,帶有腸道桿菌嘅含菌量,同糞便嘅大腸桿菌含菌量相近。香港高等教育科技學院兼職講師(科學)梁浩文博士亦表示,三文魚喺污染嚴重嘅環境下仍能生存,故此魚肉本身已含大量細菌,同處理魚生嘅方式、處所無關,建議市民避免進食三文魚生,或者煮熟先進食。

 另外,消委會喺舊年4月發表調查,喺餐廳、超級市場同外賣店購入嘅19款吞拿魚同31款三文魚刺身樣本中,有49個樣本含有重金屬甲基汞(水銀嘅有機化合物),當中更有10款超出標準,最高超標近2倍。梁浩文博士表示,甲基汞屬有機物質,可損害人體嘅神經系統,重金屬可以喺身體累積,過程中更可能出現細胞變異,引發癌症。

圖:文匯報