喺新冠肺炎疫情底下,大家嘅衞生意識都提高咗,不過,除咗做好個人防護措施之外,增強自身免疫力亦係抗疫關鍵。講到免疫力,大家應該第一時間就諗起維他命C,唔少蔬果都含有豐富維他命C,有人仲會選擇食維他命C補充劑。但係補充還補充,亦要留意唔好過量攝取,以免得不償失呀!

 根據世衛建議,成年人每日嘅維他命C攝取量唔應少於45mg ,但如果攝取過量維他命C ,即每日攝取超過2000mg,就會引起腹瀉、噁心、腹部痙攣同胃腸道不適,嚴重嘅更會引致腎結石。由於身體唔能夠儲存維他命C,過多嘅維他命C會排出體外,所以最好就每日都食維他命C豐富嘅蔬果例如奇異果、橙、西蘭花、紅燈籠椒同青燈籠椒等嚟補充維他命C,增強免疫力。

圖:HEHO