美國總統特朗普早前稱呼新冠病毒為「中國病毒」,引起唔少爭議,最近佢接受訪問時表明,唔會再用「中國病毒」呢個字眼,但國務卿蓬佩奧喺七大工業國外長會議上,就堅持以「武漢病毒」稱呼新冠病毒,但就遭到其餘六國外長嘅反對,導致未能發表聯合聲明。

蓬佩奧會後表示,美國希望同其他國家,包括中國合作,搵方法解決疫情,令更多人存活、更多人健康,重振被「武漢病毒」破壞嘅經濟。

德國《明鏡》週刊報道指,由於美國堅持要用「武漢肺炎」呢個詞語,但遭到其餘六國反對,六國認為誤導,將病毒歸咎於中國,要求用返世衞嘅正式命名,最終導致會後無發表聯合聲明。

原圖:YouTube@美國國務院