近排多咗唔少人返港,佢哋理應留喺屋企隔離,但就被市民發現好多戴住手帶、要隔離嘅人士外出,更有人破壞手帶,逃避受監控。為咗避免呢種情況再發生,政府資訊科技總監林偉喬今日(25號)表示,由歐美到港人士由今日起,會獲發具藍牙功能嘅手帶。藍牙手帶會配合手機應用程式使用,如果接受檢疫人士剪斷手帶,或離手機太遠,應用程式就會即時發出信號通知當局。

 林偉喬指,宜家有1萬條藍牙手帶存貨,下星期起每日都會有幾千條供應。佢重申,違反檢疫令屬違法行為,呼籲市民唔好以身試法。另外,資訊科技總監辦公室亦表示,為加強支援接受檢疫人士應用「居安抗疫」程式,資科辦已加派人手接聽熱線電話,並會再度發送電話短訊,提醒尚未啟動應用程式嘅人士盡快啟動,以進行監察。

圖:政府新聞網