新冠肺炎喺全球多國蔓延,原訂今年7月至8月舉行嘅東京奧運,未知會唔會如期舉行。不過加拿大同澳洲嘅奧委會,就先後表明如果東京奧運如期舉行,就唔派員參加。

加拿大奧委會發聲明表示,除非東京奧運延遲一年舉辦,否則唔會派運動員參加。聲明又提到,知道延遲奧運嘅複雜性,但運動員同國際社會嘅健康同安全比起任何事都重要,而繼續訓練運動員參加奧運亦都唔安全,強調有關決定已得到加拿大政府嘅支持。

澳洲奧委會亦表示,國內外疫情不斷變化,今年夏天將無法組織代表團參與奧運,會要求運動員為2021年準備,強調而家需要嘅係優先考慮運員健康。

原圖:大公報